Ass-a d amulli wis 11 n tmettant n ucennay Raḥim. Ad neɛreḍ deg umagrad-a ad d-nawi agezzul ɣef umecwar-is n unaẓur.
Ɣas ahat yettwassen ugar s tezlatin-is n tayri, maca yecna ɣef waṭas n yisental nniḍen, am Tmurt, timetti d ddunit.
Amedya, di tezlit « Lezzayer n uxessar », isqerdec taluft n tmagit d tsertit n tmurt-a. Yenna deg-s ladɣa: « Sakdeɣ akk sey-a d sey-a, ur walaɣ ara, ayen ara yessemlilen Izzayriyen. Terwi-aɣ tarwa n Bexta, rran tamurt-a, d tamurt n myečč-imdanen […]».
Cwiṭ ɣef tudert-is, seg unelmad armi d asɛeddi n bakalurya
Am yakk arrac Iqbayliyen n tallit-is, yeɣra Raḥim deg uɣerbaz amenzu Iɣil n Wuccen, deg Ayt Ɛisa Mimun. Syin, iɛedda ɣer uɣerbaz alemmas n Tizi Wezzu, send ad yekcem tasnawit Ɛmiruc ad ikemmel armi d bakalurya.
Mi yella yakan d anelmad, yella icennu Raḥim tikwal i yimdukkal-is d yiselmaden-is deg uɣerbaz. Ɣas yella iḥemmel ad yecnu, ḥekkun-d dakken seg 1974 i yerra ddhen-is s waṭas i ccna, m’akken i as-d-yefka xali-s tagiṭart d tamecṭuḥt, netta yefka-s abalun-is.
Mi yesɛedda akayad n bakalurya deg 1979, ibda Raḥim isnulfuy-d tizlatin d ayla-s. Iɛreḍ dɣa ad isekles ula d tasfift deg 1982, deg Yiɛeẓẓugen, maca ur as-ikemmel ara acku ur d-teffiɣ akken iwulem.
Inig-is ɣer Fransa
Deg useggas n 1984, izger Raḥim i tikkelt tamezwarut ɣer Fransa. Dinna, aṭas i yufa ɣer yidis-is acennay Fahem i yellan yesɛa imir-nni taneččit{restaurant}. Ula d aqeddic, qedcen akken lwaḥi deg-s. Armi d tafsut n 1984, yuwi-t Fahem ɣer yiwen n ustudyu deg Val-de-Marne. Yeffeɣ-d walbum-nni dɣa ɣer teẓrigin Azwaw s uzwel n « Llsas ». Seg lawan-nni, yal sin, kraḍ neɣ ugar n yiseggasen, ad d-isuffeɣ tasfift nniḍen d tamaynut.
Ayen i d-isuffeɣ d tisfifin
Isekles Raḥim deg umecwar-is 9 n tesfifin, i d-yellan akka:
- 1984 : Llsas.
- 1986 : Zaεbala.
- 1988 : A ccrab a ccrab.
- 1990 : Aḥlili aḥlili.
- 1995 : Yya ad am-iniɣ.
- 1997 : Acimi acimi.
- 1999 : Ḥader iman-im.
- 2003 : Cerwen tizemrin.
- 2005 : Ay akal
Tamettant-is ur nettwarǧa
Tamettant n Raḥim ur yedmi ḥedd fell-as, imi yiwet n tikkelt ileḥḥu d umdakkel-is deg yiberdan n temdint n Tizi, yekker-as-d wul-is yeɣli. Immut dɣa ass-nni, 13 furar 2010, di sbiṭar n Tizi Wezzu seld tazɣint n wul.
Yeǧǧa-d tameṭṭut d sin n warrac, aqcic d teqcict. Yella deg yixef-is 46 n yiseggasen, imi ilul ass 7 duǧember 1963.
