Tura aseggas segmi yemmut ucennay Naser Cebbaḥ. Mbeɛd amennuɣ akked waṭṭan ddeqs n wakud, iselqef ass n 22 furar 2020 di tmurt n Fransa, deg yixef-is 57 n yiseggasen.
Acennay-a, bu uɣanib aɣerfan mu ssawalen « cceɛbi », yella isekles di tudert-is sin n walbumen. Seg tezlatin-is yettwassnen, nezmer ad d-nebder ladɣa « Ččipa », « Lemri », « Tabrat i uriɣ », akked « Abbuh terwi ».
Ɣas ini tudert-is merra yedder-itt d aɣrib. Dɣa, aṭas i yecna di tmeɣriwin akked tecrifin i watmaten-is Iqbayliyen, akken xedmen tuget n yicennayen-nneɣ iqburen. Deg-s d aqesser, deg-s d awanes.
Ɣef tnaga n wid i t-yessnen, yella Naser Cebbaḥ dima iqebbel tinnubgiwin n tdukkliwin m’ara t-ɛerḍent ad yecnu i lfayda n umuḍin i yebɣan ad idawi.
Akka tura, yeǧǧa-d aḍebsi-s wis kraḍ i yekfa s usekles, maca werɛad i d-yeffiɣ ɣer uzayez.
Ilul Naser Cebbaḥ ass n 06 yunyu 1963 di Ǧemɛa Ssariǧ.
