Feṛḥat n Wat Sɛid s yisem adevlan Feṛḥat Mhenni, i yettwasnen s yisem n Feṛḥat Imaziɣen Imula. Ilul deg wass n 05 deg ayyur n meɣres n useggas 1951, Di taddart n Maraɣna, i yettafaṛen lɛerc n Yillulen n Umalu, di tmurt n Yiqvayliyen.
D mmi-s n Nna Wiza Ḥalit i yettwasnen s yisem Wiza n Baṛa, akked umeɣras-agraliw Ameẓyan Mhenni i yettwanɣan deg useggas n 1961.
Deg useggas n 1963, mi yesɛa 12 n yiseggasen deg tudert-is i as-tettwanefk tegnit iwakken ad yekcem ɣer uɣervaz. Almud-ines amenzu yella-d s wudem unṣiv di Chateauneuf (Alger). Din i yelmed i teɣzi n sin n yiseggasen. Syin yuɣal-d ɣer Larevɛa n Wat Yiraten, din i ikemmel almi d aseggas n 1969.
Deg useggas n 1971 yewwi-d akayad-inen n lbak, syin yefren tasdawit n Lezzayer, anida yeḍfer tussniwin n tisertiyin. Deg tallit-agi i yevda amennuɣ-ines ɣef taluft n yizerfan n wemdan d yidles amaziɣ. Akken daɣ i yekki s yimagraden deg tesɣunin Taftilt akked Itri. Snat-agi n tesɣunin llan-tt d afud i yimeɣnasen deg tallit-nni qessiḥen.
Deg useggas n 1973 mass Feṛḥat d kra n yimeddukal-is slulen-d agraw n ccna n Teqvaylit Imaziɣen Imula, s yes-s i kkin deg tfaska n uẓawan azzayri. D tarvaεt-nsen i d-yufraren, tewwi arraz amezwaru.
Gar yevrir d yunyu n useggas 1976 mi d-yella wawal d uheggi i tefrannin n urkawal aɣelnaw (Charte national), anida tella kra n temlilit yettṛuḥu, ittak-d tiktiwin-is, yettzuxu s timmuzɣa-ines. Di tallit-nni i vdan ssraves uffiren n Lezzayer ttɛasan-t anida ma yerra neɣ yerza. Amennuɣ-is deg tallit-agi yegla-d s tuṭṭfa-ines deg waggur n tuveṛ 1976 daxel n tnezduɣt tasdawant n Lqubba (Kouba). Yeqqim gar yifassen n « Sécurité militaire » 24 n tsaɛtin.
Deg useggas n 1980, mi tendeh tefsut n Yimaziɣen, deffir n ugdal n usarag n Dda Lmulud n Wat Mɛemmeṛ deg tesdawit n Tizi Wezzu ɣef yisefra iqvuṛen n Leqvayel, mmi-s n Maraɣna yella seg yimeɣnasen imezwura i d-yessawlen ɣer tikliliwin, d tigawin-nniḍen.
Di tallit-nni yeqdec nezzeh netta d umaru Kateb Yasin. Maca ula d tikelt-agi ur tezgilen ara, yeṭṭwaṭṭef acḥal d tikkelt, maca mi d-yeffeɣ yettkemmil amennuɣ-ines, ama s ccna neɣ leqdicat-nniḍen. D yiwen seg tgejdiyin i irefden amennuɣ d yisem Amaziɣ ɣef tuyat-is. Akken daɣ i yeddem amussu adelsan Amaziɣ (MCB).
Syin yekki deg uslal n tiddukla n warraw n yimeɣrasen, anda yella deg-s d imḍebber. Ur iɛṭṭel ara netta d yimeddukal-is imeɣnasen, slulen-d deg useggas n 1985 taqacuct n yizerfan n wemdan. Adavu n tallit-nni ur-as-tehwi ara tigawt-agi i d-yeffɣen ɣer Yiqvayliyen, ɣlin akk fell-asen, yal yiwen d acu i s-sbabben. Ma d amjahed n tezlit akken i s-yessawal umaru-aggag Kateb Yasin, kecmen yimsulta ɣer uxxam-is deg Yiɛeẓẓugen deg wass n 17 yulyu 1985, syin i teddmen zdat twacult-is. Gren-t ɣer lḥevs n Berwagiya, yesɛedda qriv 03 n yiseggasen. Rnan kksen-as amsineg-ines, aya-gi d aḥettem i d-tḥettmen iwakken ur i-t-ffeɣ ara ɣer tmura n Turupt i wakken ad d-yecnu neɣ ad yemlal d yimeɣnasen d tɣamsa taveṛṛanit.
Deg useggas n 1989, yekki akked Mesṭafa Baca, Meqṛan Ayt Lɛerbi, Saɛid Seɛdi deg uslal n ukavar agraw i yidles d tegdut (RCD). Feṛḥat yella d amaray aɣelnaw n yidles d umezruy deg ukavar-agi. Di tallit-nni i d-ssuffɣen aɣmis « ASALU », din yella d amasay n tira, akken daɣ i yekki deg-s s yiḍrisen-is d tmuɣliwin-is.
Deg useggas n 1991, mi d-yeffeɣ udlis « Awal ɣef Dda Lmulud » ɣer teẓrigin Asalu n ukavar n RCD, d mass Feṛḥat i s-igan tazwart. I usmekti, deg useggas n 1984 ɣer 1985 yessuqqel-d ɣer Teqvaylit adlis n Mulud Ferɛun, isemma-yas Ussan di tmurt, ffɣen-d kra n yiḥricen deg-s deg tesɣunt Tafsut. Niqal ad d-yeffeɣ udlis-agi deg yiseggasen-nni n 90, maca tiẓrigin d uɣmis « Asalu » ur ɛeṭlen ara medlen tiwwura-nsen.
Deg useggas n 1994, i mi tutlayt Taqvaylit (Tamaziɣt) ur tekcim ara ɣer lakul, ur tt-qqaṛen ara Yimaziɣen, d netta i d-yessawlen ɣer unegzum n uɣervaz, ddaw leɛnaya n umussu MCB-Coordination National.
Di tagara n dujembeṛ n useggas-agi yella di tmesrifegt n Airbus France, taneggarut-agi teɣli-d gar yifassen n yirevraven n GIA. Taluft-agi teǧǧa-d deg-s ccama meqqṛen,
Deg useggas n 1997, mass Crif Maxluf i yellan d iminig yessuffeɣ-d ɣer teẓrigin i yettwasnen deg umaḍal L’Harmattan adlis ɣef tudert d umecwaṛ n Feṛḥat Mhenni, yefka-as azwel : « Chants de Liberté : Ferhat la voix de l’Espoir ». Ayen yessewhamen d akken adlis-agi ur d-yelli ara fell-as wawal, gedlent yineɣmasen, rran iman-nsen ddreɣlen.
Deg useggas n 2001 mi tendeh tegrawla deg tmurt n Yiqvayliyen, adavu azzayri yessuffeɣ-d iǧadaṛmiyen d yibulisen, nɣan acḥal d ilemẓi. Amezwaru seg-sen d asnawi Germaḥ Massinissa, d ilemẓi n 19 yiseggasen, nɣan-t yiǧadaṛmiyen deg Wat Dwala. Mass Feṛḥat i yennuɣen d iseggasen ɣef tugdut d tlelli, i yefkan tudert-is d asfel i tnekkit d yidles-ines, iɣaḍ-it lḥal nezzeh. Din i d-tekka tikti deg wallaɣ-is, d kra n yimeddukal-is, slulen-d amussu i Timanit n Tmurt n Yiqvayliyen (MAK), i yuɣalen ass-a yessuter azref n ufraniman ara yawin agdud Aqvayli ɣer timunent-ines.
Aṣenfar-agi n Timanit, ixelleṣ-it ɣlay, i mi kraḍ n yiseggasen neɣ di yunyu 2004 nɣan-as mmi-s Ameẓyan. Aya-gi yeǧǧa-d deg-s adeddic ur nḥellu. U ɣas akken yenṭer, maca yesveṛ, ikemmel amennuɣ i uslelli n uɣref-inef, yezzi-d akk i tmurt Taqvaylit, yessegza i yimdanen asenfar i d-yewwi. Yexdem timliliyin-nniḍen akk d Yiqvayliyen i yettidiren di Turupt, Marikan d Kanada.
Deg useggas n 2008 iceggeɛ tavrat i udavu n Lezzayer, iwakken ad d-slen i tiɣri n Yiqvayliyen, maca aneggaru-agi yerra iman-is ur yeẓri ur yesli. Sin n yiseggasen d afella neɣ deg wass n umenzu n yunyu 2010, mass Feṛḥat iverreḥ-d zdat n 500 n Yiqvaliyen s tlalit n Unavaḍ Aqvayli Uɛḍil (GPK). Syin i d-tevda tgemmu tikti n Timunent.
Ɣef umecwaṛ-is, d umennuɣ i d-yewwi s talwit, deg useggas n 2013 yettunefk-as warraz agraɣlan « Prix Gusi de la Paix » n tmurt n Lfilipin, i d-yessuddus yal aseggas lsas Gusi Peace Prize International. Arraz-agi yettak anzi ɣer win Nobel i talwit.
Seg temẓi-is i yekcem deg umennuɣ, deg umecwaṛ-is yecna, yelḥa deg tikliwin, yexdem isaragen, yura imagraden, yemlal d waṭas n wudemawen isertaten d yinaẓuren igraɣlanen. Yekcem leḥvas, yessaẓreg-d idlisen, wwtent, regment, nfan-t seg tmurt n yimawlan-is d lejdud-is, serrɣen tasa-s, … Maca werǧin yekna i ucengu.
Iḍevsiyen d tesfifin i d-yessaẓreg
– Iḍ d wass + Ccna (aḍevsi n 45 tours) – 1974
– A laxeṛt yeddren – 1974
– Ccnawi n tegrawla n tmurt Taqvaylit – 1979
– Ccnawi n umennuɣ d usirem – 1981
– Lezzayer, 20 sna u mazal – 1983
– Tuɣac n ddkir – 1993
– Tuɣac n tmes d waman – 1998
– I tmurt n Leqvayel – 2002
– Adekker d usirem – 2008
– Tilelli i Teqvaylit – 2015
Idlisen-is i d-yeffɣen :
Algérie, la question Kabyle – 2004
Le siècle identitaire – 2010
La France γa-t-elle perdre l’Afrique – 2013
Noël en otage – 2015
Kabylie, mémorandum pour l’indépendance – 2017
