Uraren n tbidyutin am PUBG, Free Fire, Among Us, Ludu… d uraren i tturaren waṭas n yimdanen; imeẓẓyanen, imeqqranen abeɛda deg wussan-a n ukman. Aṭas i d-yeqqaren belli uraren-a lhan aṭas i usɛeddi n lweqt, maca daɣ aṭas i d-yeqqaren belli uraren-a ur lhin ara i tezmart.
Deg wudem amezwaru, uraren n tbidyutin ḥemmlen-ten waṭas n yimdanen almi i asen-uɣalen am lehyuf acku dinna kan i sɛeddayen lwaqt-nsen.
Tamezwarut, deg wussan-a anda aṭṭan n kuṛuna yezmer ad d-yawi lada ama i yimdanen neɣ i twaculin-nsen, leqhawi d tjemmuyaɛ megdulit, imdanen ufan-d anda ara sɛeddin lewqat-nsen mebɛid ɣef waṭṭan-a.
Tis snat, deg wuraren-a i yezmer yiwen ad d-yissin imdanen ijdiden i izemren ad uɣalen d imdukal n tidet ar sdat.
Tis kraḍt, deg wuraren-a i yezmer yiwen ad d-yelmed titiknikin n lgirra d yismawen n leslaḥ, d tɣara-nsen…
Maca deg wudem niḍen aṭas i yettagin i warraw-nsen ad uraren uraren-a; ttekksen-asen tilifuyat-nsen. Si tama acku aṭas i d-yettawin udem n ssbaḥ nutni ad tturaren uraren-a, sakkin ass-nsen yuɣal d iḍ, iḍ-nsen yuɣal d ass. Si tama niḍen, ɛyan ǧǧan lecɣal-nsen llethan d wurar, yezmer ad d-teḍru ddana deg uxxam ur d-yettawi ara s lexbar abeɛda ma yerra akitman ɣef yimeẓẓuɣen-is.
Rnu ar waya, aṭas i yettaṭṭafen ama d aṭṭan n wallen neɣ d tteqlaq, d ɛeyyu n wallaɣ ɣef demma n usɛeddi n waṭas n wakud deg wurar, anda ara naf win yetturaren uraren-a icennif aṭas, txesser ṭṭbiɛa-s ɣef kra ur yelli.
Nekk iban-iyi-d belli uraren-a lhan meɛna ilaq yiwen ad yissin ad ten-yessexdem, ad asen-yefk kan kra n wakud.
Tafrara At Wejquq
Tasɣunt ASELMAD, uṭṭun wis 8. Yennayer 2021
I wid yebɣan ad kkin di tesɣunt ASELMAD, ad arun ɣer [email protected]
