Agejdan ɣef yinzan (Tagmert seg At Ɛebbas), d adlis amaynut n umeskar-aneɣmas i yettidiren deg yinig. Wagi d mass Xlifa Yasin. Adlis-agi d ammud n yinzan, iga-as vav-is tazrawt d tesleḍt, ddan-d deg-s wugar n 1000 d inzi. Yevḍa ɣef 134 n yisevtar.
Yeffeɣ-d ɣer teẓrigin n Ccix Muḥend Ulḥusin, i yellan deg yiɣrem n Tizi Wezzu, deg kra n wussan kan ɣer deffir. Ur yettɛeṭṭil ara ad d-ikcem ɣer tnedlisin n tmurt Taqvaylit. Adlis-agi yevḍa-t umeskar ɣer wukuẓ n yixfawen{Chapitres}, iga-as tazwert umaru d umaslaḍ Yasin Zidan.
Inzan-agi akken ma llan, igmer-iten-id umeskar seg temnaḍt n At Ɛebbas, kra yecfa fell-asen, wiyaḍ yeddem-iten-d seg yimawen n temɣarin d ttlawin Tiqvayliyin.
Agzul ɣef umeskar
D mmi-s n temnaḍt n Wat Ɛebbas, i d-yefkan acḥal d udemawen n tẓuri d tira, gar-asen: At Ɛemṛuc, Malek Wari, Ḥmed Leḥlu, Ɛebbas At Rẓin, Uleḥlu, d waṭas-nniḍen.
D amaru-d amnadi, yessaẓreg-d yakan deg useggas yezrin (2020) yiwet n tullist, yefka-as azwel « Ḥṭiṭuc », akken daɣ i yettheggi leqdicat d yisenfaren-nniḍen, gar-asen yiwen n wungal iwem isemma: « Nendekwal ». Yekki deg yisevtar n Teqvaylit n uɣmis « Tiɣremt » segmi d-vdant deg useggas n 2014, di tallit-nni yella d asdawan.
Yeɣra di tesdawit n Ɛebdeṛeḥman Umira n Vgayet, syinna i d-yeffeɣ s ugerdas n liṣuns akked master deg uḥric n tutlayt d yidles Amaziɣ. Deg useggas n 2015 yewwi avrid ɣer yinig, ires deg tmurt n Fransa, anda mazal yettidir.
Ugar aya, ameskar-aneɣmas Yasin Xlifa, yeslul-d, yesselḥay yiwen n usmel iwemi isemma Afrawan (http://www.afrawan.com/) yettawi-d deg-s awal, tussna, akked yisallen yemgaraden s tutlayt Taqvaylit.
