Send iḍelli (27 meɣres) i d-iverreḥ umeskar (Auteur) Bachir Djaider deg umiḍan-ines (Compte) n Facebook s tuffɣa n udlis-ines amaynut, iwemi ifka azwel Akman d wurfan.
Adlis-agi « Akman d wurfan » d taceqquft n umezgun, teffeɣ-d ɣer teẓrigin Bookelis, s kraḍ n talɣiwin : Talɣa n lkaɣeḍ, Epub akked PDF. Tesqam-d s 9.50 €.
Agzul n tmezgunt
Segmi i d-yennulfa waṭṭan-a amaynut, Coronavirus, win iḥuzan akk timura, imdanen iɛreq-asen cedd uyeddid, ladɣa mi d-yerna ukman deg uxxam. Anfafad n Corona icewwel taxelqit, yesban-d leɛyub n tmura d yemdanen ur yefkan azal i tudert, ur yeẓran dacu i yuɣen wid d tid i asen(t)-d-yezzin. Yidir d yiwen seg-sen. Ur yuɣ ara tanumi yettɣimi si tenzayt ɣer tmeddit gar kuẓ n iɣerban. Akman rnu-as urfan, Yidir yufa-d iman-is yeḥṣel gar lɛetba d umnar, sya d anfafad, sya d ṭrad d umenɣi yal ass deg uxxam.
Awal ɣef umeskar
D mmi-s n lɛerc n Wat Weɣlis, agezdu n Bgayet, Bacir Ǧaɛider, ilul deg useggas n 1974. Mi yekcem ɣer tesdawit yeḍfeṛ aḥric n tdamsa. D amedyaz i d-yessaẓergen kraḍ n wammuden n tmedyezt, d ameskar, d amaru i d-yessuffeɣ yiwen n udlis ɣef tsertit. Akken daɣ i yettaru imagraden, iqeddec deg tɣamsa (d aneɣmas).
Idlisen i d-yessaẓreg
- L’écume des rêves, tamedyezt, tiẓrigin Tafat, 2013
- L’envers du décor, essai, tiẓrigin Tafat, 2014
- L’arche des mots, tamedyezt, Edilivre, 2020
- L’ivre poète, tamedyezt, Les éditions du Net, 2020
- Akman d wurfan, tamezgunt, tiẓrigin Bookelis, 2021
