Deg kra n wussan ɣer deffir, i d-teffeɣ tezlit tamezwarut n yilemẓi Muḥmed Akli. Tizlit-agi ifka-yas ucennay-ameskar azwel : Nudaɣ fell-am. I kunwi i iḥemmlen tizlit tazedgant, ad d-tafem tettwazuzzer deg tiliẓri tunṣivt n uxxam n teẓrigin Sirocco Records deg tansa n YouTube, tettaṭṭaf azal n 05 n tesdatin{Minute}.
Deg wayyur n dujembeṛ 2020 i yebda unaẓur Muḥmed Akli, asekles n tizlit-is deg ustudyu SDM, i yellan deg Yiwaḍiyen, agezdu n Tizi Wezzu. Astudyu-agi yella ɣef uqeṛṛu-is unaẓur Racid Tabet, i yekkin deg usekles n singel-agi. Rnu ɣer waya kkin yimẓawanen-nniḍen, gar-asen: Ǧilali Tumert, Sɛidani Akli, Rezzaq Ḥennad. Tugniwin n uklip llant-d s lmendad n mas Amayas Bourbia, ma d tilemẓit i d-yeddan deg-s d tnaẓurt Baya Allek.
Aẓawan n tezlit d ilemẓi Muḥmed i t-ixedmen, akken daɣ i yura amur ameqqṛan deg uḍris, maca fkan-as sin yilemẓiyen-nniḍen deg-s tallelt, wigi d : Ghilas Taib akked Hocine Bouilles.
Mi nesteqsa ilemẓi i yecnan « Nudaɣ fell-am » ɣef wacu-t usentel i d-tewwi tezlit-ines, yenna-d : « Tettmeslay-d s umata ɣef uɣuṛṛu deg tayri, neɣ ɣef lexdeɛ-nni i d-yettilin gar yilemẓi d tlemẓit. Dagi d taqcict i ixedɛen win ukud i d-telḥa amecwaṛ, i tezdi tayri deg kra n wakud ɣer deffir, acku ur mlalen kra n tallit, yella-d usgunfu gar-asen, maca yiwen n wass yeffeɣ-d yilemẓi-nni, iwala-tt teddukul akked wayeḍ-nniḍen, tbeddel-it yes-s. Akken daɣ i d-sbeggneɣ iḥulfan n yilemẓi-nni, i s-yennan i teqcict-nni ɣas ma msebḍan ur t-itettu ara i lebda« .
Awal ɣef ucennay Muḥmed Akli
D ilemẓi n 21 n yiseggasen, d mmi-s n taddart n Wat Ɛmeṛ, i yeṭṭafaren taɣiwan n Wayt Ubaddu. D asdawan i iḍefren aḥric n tussniwin tettiknulujiyin, deg tesdawit Mulud Mɛemmeri. Iḥemmel ccna nezzeh, d win i d-yekkren s tezlatin n Meɛtub Lwennas, Zedek Mulud, Xelwi Lwennas, Lani Rabeḥ, d waṭas-nniḍen n yicennayen n Teqbaylit.
Ibda icennu mi isɛa 14 n yiseggasen deg tudert-is, sin n yiseggasen d afella yessenṭaq tamundult. Deg useggas n 2018 i as-tettunefk tegnit ad icnu ɣef usayes{Scène}, ayagi yella-d deg taddart-is. Seg yimir-nni ur yeḥbis asayes yettak-it i wayeḍ, yessaweḍ ɣer yiswi-s s tezlit-ines tamezwarut, u d win yessaramen ad d-irnu tiyaḍ.
