Ass n 11 di yebrir i d-iverreḥ umedyaz Ǧamal Meḥṛug deg umiḍan-ines n Facebook s tuffɣa n wammud-ines wis sin n tmedyezt. D ammud iwemi ifka azwel : Amakun d usugen. Tirga-w d wayen nniḍen. Yeffeɣ ɣer uxxam n teẓrigin Imal, i yellan deg temdint n Tizi Wezzu.
Ammud-agi yevḍa-t umeskar-amedyaz ɣef 224 n yisevtar, ddan-d deg-s n 90 yisfra yemgaraden, akken daɣ i t-yevḍa ɣef sin n yiḥricen : Aḥric amenzu isemma-yas « tirga-w », ma aḥric wis sin ifka-yas azwel « ayen nniḍen« . D ammud ara yenzen deg tnedlisin, s ssuma n 400 n yidinaṛen. Tazwert-is tella-d s lmendad n mas Meḥṛug.
Deg kra n wussan ɣer zdat ad d-yili uzuzzer-ines deg akk timnaḍin yemgaraden n tmurt n Taqvaylit. Akka tura tzemmrem ad ti-tafem ɣer umeskar deg tesdawit n Mulud Mɛemmeri, i mi amedyaz din i ixeddem.
Isental ɣef yessefra mas Meḥṛug Ǧamal deg wammud-agi mgaraden. Yewwi-d sya ɣer da, gar-asen: Taqvaylit, tasertit, tamurt, timetti, akken daɣ i yerra tijmilin i wid d tid yuklalen.
Tukkist seg usefru « Tirga-w »
Tirga-w,
Tirga-w kkant deg usugen
D axbac akked usuden
D tigad i ixulfen tiyaḍ
Tirga-w,
Tirga-w d akessar d usawen
D asmunger akked uxemmem
D amkan-nni i deg tettnaɣ tsussmi d leɛyaḍ
Tirga-w,
Tirga-w d imeṭṭi yettkexkixen
I iselɣen tezweɣ ɣef wudem
D telqeq i izeḍɣen ablaḍ
Awal ɣef umedyaz
Ǧamal Meḥṛug, ilul deg taddart n Ugni Ferru, i yeṭṭafaren taɣiwant n Wayt Tudert, tamnaḍt n Wat Wasif. Seg temẓi-is i iḥemmel tamedyezt d wayen yerzan taẓuri, isfra-ines imezwura yura-ten mi yella yeqqaṛ deg tesnawit.
Mi d-yewwi akayaḍ-ines n bakaluṛiya deg useggas n 2007, ijerred iman-is deg tesdawit n Mulud Mɛemmeri, deg Tizi Wezzu. Din i ifren tutlayt d yidles Amaziɣ, almi d aseggas n 2011 yeffeɣs ugerdas n turagt deg taɣult-agi.
Mi d-yeffeɣ seg tesdawit n Tizi Wezzu, ur iɛeṭṭel ara yewwi abrid ɣer tmanaɣt n tmurt n Lezzayer, din i d-yesɛedda aseggas deg uɣerbaz unnig n tɣamsa. Deg useggas n 2014 yuɣal-d ɣer tasdawit n Mulud Mɛemmeri, ikemmel aḥric n master, deg 2016 i d-yewwi agerdas-ines n master deg wayen yerzan tiẓuriwin d tsekliwin. Akka tura yettkemmil deg uswir n dukṭura, a-t-an deg useggas-is wis sin deg uḥric n tsekla.
Deg furaṛ 2020 tettunefk-as tegnit i yessarem acḥal aya, yessuffeɣ-d ammud-ines amezwaru n tmedyezt. Ifka-as azwel : Asḥissef d usebɣes, yeffeɣ-d ɣer uxxam n teẓrigin Imal.
Ammud-agi yettnuzu deg waṭas n tnedlisin n tmurt Taqbaylit, s ssuma n 350 n yidinaṛen. Yebḍat umedyaz-ameskar ɣef 133 n yisebtar, ddan-d deg-s 30 n yisfra.
