S ttawil n tkebbanit tamarikanit Zoom, Tasdawit Tamaziɣr n Luṛup (European Amazigh University), tettkemmil deg leqdicat-ines s uncad n yimyura, isdawanen, agaggen, … i d-yettawin awal ɣef tsekla, idles, tasertit, akked tlufa iceɣben Tamazɣa s umata, tamurt n Yiqbayliyen ladɣa.
Tikelt-a tefka-yawen-d ttiɛad akked umaru, amesniles (Linguiste) Saɛid Cemmax, i wass n 02 deg waggur-agi n mayyu ɣef 07 n tmeddit. Timlilit-agi d tin ara d tḍefrem deg usebtar n Facebook n tɣerɣert tumḍint European Amazigh University
Asarag-agi ad d-tili s lmendad n massa Jeǧǧiga Isɛed, ddaw n uzwel « Tasekla Taqbaylit yuran : Awal ɣef tsekla tuntit ».
I usmekti, mass Cemmax ilul deg useggas n 1968, deg taddart n Wat Buɣerdan, di tama n Buɣni, d amaru, yessaẓreg-d yakan yiwen n wammud n tullisin, isemma-as « Gar zik d tura », akken daɣ i yura aṭas n yimagraden d tezrawin, i d-yeffɣen deg yiɣmisen, d tesɣunin yemgaraden.
D aselmad n tesnilest deg tesdawit n Mulud Mɛemmeri, di Tizi Wezzu, d win i yellan d ameɣnas deg umussu adelsan Amaziɣ (MCB), akken daɣi yekki deg umussu asduklan, yella d aɛeggal deg waṭas n tiddukliwin.
Ugar n waya mass Cemmax d win yettaken afus n tallelt i yimeskaren (Auteurs), inelmaden d yiselmaden, akken daɣ i yettara i tiɣri n tiddukliwin tidelasin, ixeddem isaragen, d temliliyin-nniḍen.
![](https://vava-innova.com/wp-content/uploads/2021/05/179373884_295738432174504_6337788189631443833_n-1-724x1024.jpg)
![](https://vava-innova.com/wp-content/uploads/2021/05/Said-Chemmakh.jpg)