Tiddukla « Azday Adelsan n Weqqas » i yettwasnen s temliliyin-is tiseklanin, tefka-d ttiɛad i wid d tid iḥemmlen idles s umata ɣer yiwet n temlilit ara d-yilin azekka n 06 deg waggur-agi n mayu ɣef 08:30 n yiḍ.
Timlilit-agi d tin ara d-yilin deg tzeqqa n sinima n Uweqqas, i yellan sdat n uxxam adelsan Ṛeḥmani Sliman. Takcumi ɣer tzeqqa, ad d-tili s wazal azamal {Symbolique} n 100 n yidinaṛen.
Ahil d win ara yebdun s tceqquft n umezun « Tirga n umeḥbus » n tekrut {Troupe} Arraw n Tlelli, syin akin d nuba n sin n les sketchs n tekrut n Yiɣil Yesli, amezwaru s uzwel « Zzwaj » wis sin « Lqahwa ». Syin ad tettunefk tegnit i talilt {Chorale} n tiddukla Azday. Timlilit ad tekfu s ucennay Raziq Meɛzuzi, i d-yessuffɣen tizlit-is tamezwarut s uzwel « Ay Aqbayli » deg 20 n yebrir yezrin.
