Tuqqna tadigant {Local} n umussu n ufraniman n tmurt n Yiqvayliyen n Yiwaqquṛen, ddaw leɛnaya n tuqqna n wenẓul MAK-ANAVAḌ, tessuddes-d yiwen n usarag-askasi akked umeskar-aselmad mass Larbi Yahioun.
Timilit-agi d tin ar ad d-yilin, i yiḍ-agi n 09 deg mayyu ɣef 21h, deg umṛaḥ n Yiwaqquṛen (Tuviret) i yewwin isem n « 06 mayu 1957 ». Ad d-tili ddaw n uzwel « Tasekla Taqvaylit yettwarun« . Ad yekfu usarag s usnaz d uvuddu n udlis aneggaru n umaru, di teẓrigt-ines tis snat « Taqvaylit iles d yidles« .
I usmekti, mass Yahioun d aselmad n tutlayt d yidles Aqvayli, deg uɣervaz alemmas, d aɛeggal deg tiddukla tanmettit « Tamagit » n taddart-is deg Tefrit. D ameskar i d-yessaẓergen ukuẓ n yidlisen, d amedyaz, d win i d-yezzin i tmurt Taqvaylit s yisaragen d temliliyin. Yewwi ddeqs n warrazen iseklanen, imi yettiki s tullisin. D ameɣnas deg umussu n ufraniman n tmurt n Yiqvayliyen.
Γef ddemma n udlis-ines « Taqvaylit iles d yidles » i ɣef i d-yewwi awal ɣef wansayen d umezruy n tmurt Taqvaylit, i yevda udavu azzayri igdel-as xilla n temliliyin d yisaragen-is.
