S ttawil n uẓeṭṭa anmetti Facebbok, axxam n teẓrigin Imru iberreḥ-d s tuffɣa n wammud amezwaru n tmedyezt, n yilemẓi Ṭaher Arezqi. D ammud i deg i d-ddan 26 n yisefra, yefka-as umeskar azwel : « Tayri n tafat », yebḍa-t ɣef 72 n yisebtar.
Adlis-agi ad yettwazuzzer deg tnedlisin n tmurt Taqbaylit, am Tizi Wezzu, Bgayet, Tubiret, d wanda-nniḍen. D win i d-yesqamen s ssuma n 250 n yidinaṛen. Iga-as tazwert umedyaz-ameskar Salem Ɛemṛan.
Isental i ɣef yessefra umedyaz deg wammud-agi « Tayri n tafat », mgaraden, yewwi-d sya d sya. Yessefra ɣef : Tayri, tawennaḍt, asirem, timetti d tudert n yal ass, tirag, tutlayt d yidles, amezruy d wayen-nniḍen.
Ciṭ seg tmeddurt n umedyaz
Ṭaher Arezqi, d mmi-s n taddart Timesfit, i yeṭṭafaren taɣiwant n Assi Yusef, tamnaḍt n Buɣni. Ilul deg wass n 29 deg meɣres n useggas 1984, d win ikecmen annar n tmedyezt deg useggas n 1999, mi yesɛa 17 n yiseggasen deg tudert-is.
Yekker-d s tmedyezt n Muḥya, Si Muḥend Umḥend, Lewnis Ayt Mengellat, d wiyaḍ.Yekki deg waṭas n tfaskiwin n tmedyezt i d-yettilin sya ɣer da deg tmurt Taqbaylit, gar-asent : Tafsaka n Meɛtub Lwennas, Adrar n Fad, deg Wayt Smaɛel, akked tin n Yitri adelsan n Uqbu, tafaska n Wat Lqasem, tafaska n Wat Wasif, akked tin n Wat Leqṣer deg Tubiret, syin i d-yewwi arraz wis sin, deg useggas n 2018.
Ugar n tmedyezt, ilemẓi Ṭaher Arezqi yettaru tullisin, yettheggi ad tent-d-yessuffeɣ d ammud deg useggas-agi n 2021. Akken daɣ i mazal yettkemmil tira n tmedyezt.
