Ass n 10 deg wayyur n yulyu i tekfa tfaska n tmedyezt Taqbaylit, i d-tessuddes tiddukla tadelsant « Tafat » n Wat Lqasem, di tama n Buɣni, deg teẓrigt-ines tis ukuẓ, i yuɣalen d tajmilt i umaru-amedyaz d umeɣnas Yusef Ɛacuṛi.
Tasqamut n waktazal di tfeska n tewwurt n Lɛinṣer ( At Laqsem), tella-d s lmendad n yimeskaren : Nouredine Ait Slimane, Salem Amrane, Hamid Ait Slimane, Hacene Halwane. D taẓrigt i deg kkin wugar n 30 n d amedyaz, maca ufraren-d seg-s ala semmus n yimdyazen, s semmus n warrazen yemgaraden.
- Arraz amezwazu : d win n umaru Yusef Ɛacuṛi, yettunefk i mass Aissa Yehia Messaoud.
- Arraz wis sin : d win n mass Yeddaden Mohamed, yettunefk i yilemẓi Menzou Azaim.
- Arraz wis kraḍ: d win n mass Yahiaoui Achouri, yettunefk i umedyaz Mohand Babou.
- Arraz wis ukuẓ : d win n mass Hami Said, yettunefk i umedyaz Ahmed Khetabi.
- Arraz wis semmus : d win n mass Djaroum Amar, yettunefk i tlemẓit Melina Zaid.
I usmekti, taẓrigt-agi tis ukuẓ tettwasuddes i teɣzi n wukuẓ n wussan : 07, 08, 09, 10 deg waggur-a n yulyu deg-i nella. Yella-d deg-s yiwen n wahil d amesbaɣur. Deg tazwara tella-d tnagit ɣef umecwaṛ d leqdicat n umaru iwemi tuɣal tejmilt, mass Yusef Ɛacuṛi. Akken daɣ i d-tella temzikent d kraḍ n yisaragen ɣef taɣulin yemgaran.
Asarag amezwaru d win n umaru-aselmad Saɛid Cemmax, s uzwel « Tamuɣli ɣef tsekla Taqbaylit yuran ». Asarag wis sin n umedyaz Salem Ɛemṛan, iwemi yettunefk uzwel « Tirmit-iw di tira, si tmedyezt ɣer umezgun. Ma d asarag aneggaru d win umaru-amazray mass Yunes Ɛedli, iga-t ɣef 150 n yiseggasen ɣef tedyanin n 1871.
Ciṭ seg tudert n umedyaz Ɛisa Ajenniw
Ɛisa Yeḥya Mesɛud, s yisem-is n tẓuri Ɛisa Ajenniw, ilul deg useggas 1994 di taddart n At Meslayen, i yezgan deg tɣiwant n Uqbil (Micli). Seg temẓi-s i imal yerna iḥemmel tamedyezt, acku yufrar-d deg yiwet n twacult n yimdyazen.
Asmi yesεa 15 n yiseggasen yebda yettaru isfra-ines imezwura s tuffra, yessedhay iman-is kan. Maca mi d-yewwi lbak-ines deg useggas 2016, tettunefk-as deg tesdawit n Mulud Mɛemmeri, imi yeḍfer tasekla d yidles Amaziɣ, yemlal-d d waṭas n yimdyazen… am Rabeḥ Qeddur, Muḥend Arezqi Buεam, d wiyaḍ i s-yefkan tabɣest akken ad ikcem annar n tmedyezt s wudemunṣib deg tfaskiwin i d-yettilin di yal tiɣmert n tmurt Taqbaylit.
Deg 2020 yekki di temzizelt i d-heggan yinlmaden n ugezdu n Tmaziɣt, dinna yufrar-d s warraz amezwaru. Akken daɣ i d-yufrar s warraz-nniḍen di tfaska i yuɣalen d tajmilt i umedyaz-anaẓur Ḥmed Leḥlu, i d-thegga tiddukla tadelsant n yinaẓuṛen n Tizi Wezzu deg uxxam n yidles Mulud At Mεemmeṛ.
Ugar aya Ajennwi Ɛisa yessufɣed yiwen n uklip s uzwel « Anef-iyi », d aḍris i yura umedyaz Muḥend Arezqi Buεam. Deg useggas-a deg-i nella Ɛisa Yeḥya Mesɛud yewwid agerdas n licence deg wayen yerzan tasekla Tamaziɣt.
Awal ɣef umaru Yusef Ɛacuṛi
D mmi-s n tmurt n Yiqbayliyen, ilul deg useggas n 1969 deg temnaḍt n Tizi Wezzu, yettidir deg Wehṛan. D amedyaz, d ameskar, d yiwen seg yiɛeggalen n tiddukla tadelsant Numidy,a yura imagraden deg tesɣunin yemgaraden, yessuqel-d ddeqs n yiḍrisen d tceqqufin n umezgun ɣer tutlayt Taqbaylit.
Iga ddeqs n temliliyin d yisaragen, yurar amezgun, yekki deg tfaskiwin n tmedyezt, d rreḥbat n yidlisen, yessaẓreg-d idlisen, gar-asen:
- Aklan n tayri, tullisin, 2012
- Ijeǧǧigen n ccwal, ungal, 2014
- Ixef n usennan ungal, 2018
