Yeffeɣ-d wammud n tmedyezt n yilemẓi Rabah Bedaouche s uzwel « L’aube illuminée »

,

Deg kra n wussan ɣer deffir i d-yeffeɣ wammud n tmedyezt s tutlayt n Molière n yilemẓi anaẓur Rabah Bedaouche, ɣer teẓrigin Tafat i ɣef yella umaru mass Tareq Ǧerrud d anemhal.

D ammud wis kraḍ n umedyaz Rabeḥ, yefka-as azwel « L’aube illuminé », yebḍat ɣef wukuẓ n yixfawen (Chapitres), ddan-d deg-s 152 n yisbtar. Akken daɣ i d-ddant deg-s kra n tugniwin, d wunuɣen i d-yefren bab-is, ayagi yerna-as-d ccbaḥa.

D adlis ara d-tafem yettnuzu akka tura deg kra n tnedlisin n Uweqqas, akked temdint n Bgayet, si leɛḍil ad yaweḍ ɣer tamiwin d temnaḍin-nniḍen n tmurt, yesqam-d 500 n yidinaṛen.

Awal ɣef umedyaz

Rabah Bedaouche ilul deg useggas n 1993, d mmi-s n temnaḍt n Uweqqas i d-yefkan Ṛeḥmani Sliman, d wiyaḍ i irefden imru. Ibda isurrifen-is imezwura deg tmedyezt deg useggas n 2012, mi yella d anelmad deg tesnawit n umeɣras Ceɛban Ɛmeṛ n Uweqqas. Di tallit-nni yettaru isfra d iwezlanen, d icqfan kan ɣef tayri i t-yerḥan i yerḥan ilemẓiyen s umata.

Bab n wammud « L’aube illuminé » d win yettarun isfra ɣef xilla n temsal d tlufa, gar-asent : tayri, timetti, tasertit, uguren n yal ass, akken daɣ i yettarra  tijmililin i yinaẓuren, d yimawlan.

Iḥemmel nezzeh ccna n Teqbaylit, yegma-d s tezlatin n  Lwennas Meɛtub, Lunis Ayt Mengellat, Sliman Ɛazem, d wiyaḍ, yerna iwgem-d seg tmedyezt-nsen. Akken daɣ i iḥemmel a d-isel i uɣanib n cceɛbi. Seg yinaẓuren d yimeskaren ibeṛṛaniyen imal ɣer Meḥmud Derwic, Nagib Mahfouz, Baudelaire, d waṭas-nniḍen.

Ilemẓi Rabah tettunefk-as tegnit yakan iɛedda-d deg umaṭṭaf n ṣumam, akken daɣ i d-uran fell-as kra n yiɣmisen yemgaraden, ama ɣef umecwaṛ-is, ama ɣef tmedyezt-is, d yidlisen i d-yessaẓreg.

Ugar n waya ameskar Rabaḥ Bedaouche yettheggi ungal s tutlayt tafṛansist, akken i yekkat tamundult, dɣa ɣef tneggarut-agi nesteqsat ma yella yettheggi kra n tezlit, yerra-d : « Ayagi d tamsalt n wakud, ad d-yas wassen-nsent, acku ḥemmleɣ abrid-agi n tezlit d uẓawan ».

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube