« Taɛekkazt n lejdud », d azwel-a i tefren tmeskart Naɛima Benɛezzuz i wungal-is i d-yeffɣen ɣer uxxam n teẓrigin « Busekkin ». Adlis-a tsuffeɣ-iti-d lal-is deg wass n 25 yunyu yezrin, ilmend n usmekti wis 23 n tmenɣiwt n ujgu n tezlit Taqbaylit Lwennas Meɛtub. D ass i d-yeǧǧan camma ur nḥellu deg ugdud Aqbayli, d yiɣerfan yettnaḍaḥen ɣef tilin-nsen.
Ungal-a tebḍat tneggalt ɣef 12 n yixfawen, ddan-d deg-s 159 n yisbtar, tawlaft n tduli n uletma-s n tmeskart Katya Benɛezzuz. Akka tura adlis-a yettnuzu di kra n tnedlisin yemgaraden n tmurt Taqbaylit, di leɛḍil ad d-yaweḍ ɣer wanda nniḍen.
Wid, tid i t-yettnadin akka tura zemren(t) ad d-tafen(t), ɣer tnedlisin Salḥi, akked Maison de livre di Sidi Ɛic. Sumam, akked Ḥassisen (Arc en Ciel / place Guidon), di Bgayet. Cheikh, Libre pensée Yahiaoui, Djurdjura, Salon de livre, di Tizi Wezzu. D ungal i yettnuzu s 500 n yidinaṛen.
Tukkist seg wungal
Sedda, ur asen-tenni ara srid i nutni, meεna tehder-it anda-nniḍen, yedda wawal, yewweḍ-iten. Ḥedd yesqerdec-it, ḥedd fiḥel, yal wa amek i iwala iman-is, yettcebbiḥ udem i tikti-s. Win akken i iεawden leḥsab-is, yessukkes-d leɣlaḍ i yiman-is, iga leqyud i uḍar-is. Ma d win i yewwten deg yifer-is, ibeddel amkan i lεecc-is, yiwen wass ad nnejmaεen leḍyur, ad xedmen tameɣra ɣef lehdur, ɣef tutlayt-nsen amek ara teqqim tettnur, netta ad yekcem gar-asen mebla azal, ad ixeddem ɣef wayen ur as-d-ǧǧin lejdud, sdat-s ad kkaten deg uẓar-is, netta ur d-yettban later-is, ad leεben yis-s am uqrur, mi kfan ad t-ǧǧen deg leɣrur.
Awal ɣef tneggalt
Naɛima Benɛezzuz, d tilemẓit i d-tefka taddart n Yiɛezuzen, di Bgayet, tlul deg useggas n 1982. Ɣas akken werǧin tekcim aɣerbaz, ɣas akken teǧǧa-tt tezmert, maca ur tebri ara i ṭṭbel deg waman, tnuḍeḥ mgal-nsen, acku tḥemmel tafat, tḥemmel tudert.
Seg temẓi-is tezga tettawi-d isfra, syin terra-tt i tira n wungalen, maca ur as-tettunefk ara tegnit iwakken ad ten-d-tsiẓreg, ad d-ffɣen, almi d aseggas n 2019 i d-yeffeɣ wungal-is amezwaru, iwemi tefka azwel « Tudert n tmara ».
I usmekti, Naɛima Benɛezzuz tella-d i lmendad-is uletma-s Katiya, d nettat i s-yettarun iḍrisen-is, d nettat i d-yelhan d usiẓreg akked uzuzzer n yidlisen-is.
