Ilemẓi mu ssawalen Walid Haderbache, i iruḥen di taddart n Ugemmun, taɣiwant n At Mεuc, asamar n Tmurt Taqbaylit, ufan-t ass-a tasebḥit ur t-yuɣ wara.
Γef wakken i d-yuwi talɣut{information}-a umaṭṭaf n Sumam, d imawlan-is i d-iberrḥen s umaynut-a yessefraḥen seld ddeqs n uswiε n uttqelleq d ddiq, war ma fkan-d ugar n yisallen ɣef tifin-nni.
Ad d-nesmekti dakken yella yeffeɣ-d uberreḥ n rrwaḥ n yilemẓi-a bu 14 n yiseggasen iḍelli 16 furar 2021. Seg yimir-nni, d iɣermanen{citoyens} neɣ d at tɣamsa, neɣ d iseqdacen n Facebook, yal yiwen iga ccɣel-is akken ad d-iban yilemẓi iεerqen. Γef waya, snemmiren twacult-is d yiqriben-is imdanen merra i iḥebbren yid-sen di tegnatin-nni iweεren.
Ula deg yiẓeḍwan inmettiyen beyynen-d medden tumert-nsen seg tifin n uqcic-a, maca daɣen sawlen i uxemmem di taluft-a n rrwaḥ n yilemẓiyen. Am Sufi. M. i d-iwennten aya : « D ayen yelhan. Maca ilaq ad muqlen s tidet deg uɣilif-a yiqeddicen n tɣellist, isɣuren iɣurbizen d yimawlan n warrac daɣen ».
D aɣilif d tidet, imi yerna yemɣur taggara-a umḍan{nombre} n warrac, inubiyen d yilemẓiyen yettriɛen di Tmurt Taqbaylit.
