« Tafsut n tmanyin », la nouvelle chanson de Zedek Mulud
Ass n 18 deg waggur ni yebrir 2020, amedyaz acennay ameqqṛan n teqbaylit Mulud Zedek isuffeɣ-d tizlit tamaynut i lmend n usmekti wiss 40 n tefsut tamaziɣt n 1980.
Di tezlit-agi i d-iffɣen kan weḥd-s war ma yeffeɣ-d walbum, amedyaz yerra azal i yineḍṛuyen n tefsut imaziɣen i deg kkren yilmeẓyen ad rẓen asalu n tegdi. Tafsut i yeldin abrid i tutlayin d yidles amaziɣ ad ddun ɣer zdat.
Deg wawal-is, Mulud Zedek yerra azal i umusnaw ameqqṛan Dda Lmulud At Mɛemmeṛ. Amyaru amnadi i wumi yettwagdel usarag armi kkren yakk yineḍṛuyen n tefsut.
Syin ɣer-s, amedyaz icna-d ɣef yilmeẓyen i d-ikkren akk ass-n, i yewwten yall wa wayen yezmer, i yennuɣen, isuɣen, yuran, ikecmen ɣer leḥbas i wakken ad yidir wayla-nsen. Di kra yefyar inna-as umedyaz :
Am yiwen i d-nsuɣ
Neɛya di lbaṭel
Ur nḥebbes amennuɣ
Alamma tbeddel
Nnig wayen akk iḍṛan, amedyaz ur iqqim ara kan di twalsa n umezruy, maca issenfali-d assirem-is. Ulamma d assirem icerken akk iqbayliyen d yimaziɣen anda ma llan, abeɛda mi ara kecment tutlayin timaziɣin s aɣerbaz, ad ilint deg yidlisen, ad sɛunt amkan gar tutlayin, yerna aṭas deg-sent ara ifent. Inna-as umedyaz :
Ad tt-naru ad tt-nesɣeṛ
Ad tif tutlayin
Ad d-nesmekti d akken amedyaz n teqbaylit Zedek Mulud, mačči d tikkelt tamezwarut i deg ara yerr azal i umennuɣ ɣef tmaziɣt neɣ af teqbaylit. Amecwar-is n tezlatin igget d isefra d yiḍṛisen i deg yules-d amezruy, icewweq-d aṭṭan, isuɣ-d lqeṛḥ, icna-d assirem, ifka-d aweṣṣi, maca ayen yugaren aya, issuli aswir n tmedyazt taqbaylit. Gar tizlatin i deg yerra tajmilt i tefsut taberkant n 2001, ad d-nebder tizlit « Tafsut » i d-iffɣen deg walbum « D aderwic ». Nessaram ad as-yerr daɣen azal aseggas i d-iteddun imi d amulli-ines wiss 20.
