Deg yiseggasenn-a ineggura yennerna nezzeh unnar n tsekla taqvaylit, ladɣa mi d-tteffɣen waṭas n wungalen. Deg useggas n 2019, ffɣen-d 19 n wungalen, yal ungal s umeskar-ines, yal ameskar s leqdic-ines. Gar wungalen-a, yella win i yura Lyes Belɛidi.
Deg wayyur n tuveṛ n useggas 2019, i d-yeffeɣ wungal amenzu s tutlayt taqvaylit, n yilemẓi Belɛidi Lyas ɣer uxxam n teẓrigin « Imru », i d-yezgan deg ugezdu n Tizi Wezzu.
D ungal iwumi yefka umeskar azwel : « Yezger asaka ». Yevḍa-t ɣef semmus n yiḥricen, yal aḥric yefka-s azwel-ines. Ddan-d deg-s 112 n yisevtar.
Ungal-a d win yettnuzun deg tnedlisin n tmurt taqvaylit, yella di Tizi Wezzu, Tuviret, d Vgayet, d wanda nniḍen. Yesqam-d s 450 n yidinaren.
Awal ɣef umeskar
Deg Larevɛa n At Iraten i ilul Belɛidi Lyas, ass n 06 di tuveṛ n useggas 1990. D ilemẓi n 30 n yiseggasen. Akka tura a-t-an d aselmad n tutlayt d yidles amaziɣ, deg tesnawit n temnaḍ-is iwumi semman « Xewwaṣ Ḥsen ».
Mi yerveḥ akayaḍ n BAK, tessawel-as-d tesdawit n umusnaw Mulud Mɛemri di Tizi Wezzu, din i yefren ad yuɣal d aselmad n tutlayt-is. Dɣa syin i d-yewwi agerdas n Lmaster.
Ameskar, d win i iḥemmlen ad yaru s tutlayt-is, d aya i d-yeǧǧan ad yekki deg waṭas n temsizlin d tfaskiwin i d-yettilin da di tmurt ɣef teqvaylit s umata.
Yewwi yakan arraz wis kraḍ n tullisin Belɛid At Σli i d-tessuddus tesveddit TIREGWA, yal aseggas. Akken daɣ i d-yufrar s warraz wis sin deg tfaska n udrar n fad, deg Ayt Smaɛel.
Ugar aya, mmi-s n Ayt Iraten, yella seg wid i d-yeslulen tasɣunt « Aselmad », tikwal yettaru-d deg-s akka kra n imagraden. Akken daɣ i yettaru s teqvaylit deg uɣmis n imaziɣen. Rnu ɣer waya Lyes yettaru ticeqqufin n umezgun, ɣef waṭas n yisental-nniḍen.
