Yeffeɣ-d deg ussan-a yezrin udlis amaynut n umaru-amedyaz Fahim Mesɛudan, ɣer uxxam n teẓrigin « Ɛeccab » {Achab}. D adlis iwemi yefka umeskar azwel: « Izir deg irebbi n teẓgi ».
D adlis ara yettwazzuzren s lmendad n teẓrigin »Odyssée » akked ‘‘Planitaire » deg ussan-agi i d-iteddun di tnedlisin n tmurt Taqvaylit. Yesqamed s 250 n yidinaren. Izir deg irebbi n teẓgi, d adlis i yigerdan, yebḍa-t umaru ɣef 68 n yisebtar.
Ayen ɣef i d-yewwi udlis
Nesteqsa amaru-aneggal, yenna-d: ‘’D tadyant yeḍran di taddart n Uzaɣar akked yiwen uqcic, qqaren-as Izir. Asmi yesεa aseggas di leεmer-ines, truḥ twacult ɣer wurti ad d-lwin lexrif. Mi wwḍen, tesgen-it yemma-s sddaw n tneqlet ; mi d-tuɣal ɣur-s, tufat-id ulac-it. Ukren-t ibekkan. Deg wass-nni ur d-iban. Zrin yiseggasen, uɣalen ufan-t. Yewwit-id baba-s s axxam. Ussan-nni imezwura, uryeqbil ara tudert-nni sdaxel n uxxam. Yuɣal yekcem s aɣerbaz, maca ur d-yewwi ara iman-is : igemmaḍ-is xuṣṣen mliḥ. Yettaεgaz ad iruḥ s aɣerbaz. Yiwwas, yesla-as i baba-s d yemma-s ttnaɣen ɣef tmezzla n uyaziḍ n yimensi n Yennayer… Yesla-as i baba-s mi i as-yenna i yemma-s : »azekka tameddit, ad t-zluɣ… ». Izir, yuggad yenwa-as fell-as i ɣef ttmeslayen. Azekka-nni, terra-t-id tselmadt- is axxam i wakken ad yawi imawlan-is acku tufa unuɣ n tmeṭṭut d tawfayant am nettat ɣef ṭṭabla n Izir, wayeḍ ɣef tfelwit n tneɣrit, terra-tt-id ɣef Izir. Izir, yuggad ad yekcem s axxam. Iruḥ yerwel ɣer teẓgi…’’.
Agzul seg tmeddurt n umaru
Ilul Fahim MESƐUDEN ass n 7 di maggu deg useggas n 1981, deg taddart n Uzaɣar Ɛwana (Iɛekkuren). Laṣel-is n taddart n Agarsafen ( At Yeǧǧar). Ɣef umecwar-is deg unnar, yenna-d : ‘’Deg useggas n 2004, yewwi-d agerdas n « DEUA en électronique » di tesdawit n Tizi Uzzu. Yeqdec aṭas deg umussu adelsan, yella d aɛeggal deg waṭas n tddukliwin tidelsanin. Yedmeɣ d aselmad deg uɣerbaz n uselmed n lḥirfat deg win n Buzgan akked win n Buxalfa. Deg useggas n 1999, yura tamezgunt anda yurar deg-s d awadem netta akked terbeɛt i d-yeslul. Di 2000, yeslul-d tiddukla tadelsant di taddart-is. Di 2012,yella d imceggeɛ n Radyu Numidya yellan di Kanada. Di 2014, yeslul-d timlilit n tmedyazt di teẓrigt-is tamezwarut akked tddukkla tadelsant n taddart-is. Deg useggas 2016, yeslul-d tiddukkla n tmerrit di taddart-is. Di 2014, yeda yettaru imagraden s tutlayt n teqbaylit deg uɣmis « Tiɣremt » d « La dépêche de Kabylie». Deg useggas n 2016, yunag ɣer tmurt n Fransa anda yettidir ar ass-a.
