Kamal Bentaha ilul deg useggas n 1968 deg Yiɛeẓẓugen, d mmi-s n taddart Ceṛfa n Behlul, d amsefɣul (Caricaturiste), seg yimeskaren imezwura n tesfifin n wunuɣen s tutlayt n Teqvaylit.
Yevda leqdic-is deg uḥric-agi n tfiɣult d tesfifin n wunuɣen s wudem unṣv deg uɣmis « Le Pays-Tamurt » deg useggas n 1994. Imi deg tallit-nni aɣmis-agi d netta i d amenzu i yeskecmen tutlayt Taqvaylit deg yisevtar-ines. Syin d afella yeqdec deg uɣmis i d-iteffɣen s tefṛansist «Les nouvelles confidences», yerna yeqdec ula deg tesɣunt n yigerdan, tin iwemi ssawalen «Nounou».
Deg useggas n 2013, yessuffeɣ-d ammud-is amezwaru n yifɣal, kra n wakud akken-nni, tanmehla n yilemẓiyen (DJS) akked tkebbanit n waman (ADE) n lwilaya n Tizi Wezzu ssutren-t deg-s, ad sen-ti-d-yexdem adlis i uwelleh, iwakken ad seḥvivren-t ɣef ugama d waman.
Deg useggas n 2016, Kamal tekka-d seg allaɣ-is tikti, yenna deg yiman-is acimi mačči s tutlayt-inu ara d xeddmeɣ tisfifin n wunuɣen ? Dɣa deg useggas-agi s lmendad n uxxam teẓrigin « Le Terroir » i yellan deg yiɣrem n Tizi Wezzu, i d-yessaẓreg tasfift-ines, iwemi yefka azwel « Ɛeẓẓi akked Ɛezzul ». S tesfift-agi i d-yewwi arraz amezwaru seg Lezzayer, imi yekki deg tfaska tagraɣlant n tesfifin n wunuɣen, deg teẓrigt-ines tis 09 (Fibda).
Seg yimir-nni ur yeḥvis ara, yezga yettaru, ixeddem ifɣal, mi yekfa ad yessuffeɣ. Akka tura ɣur-s 04 n tesfifin n wunuɣen, akked udlis n yifɣal.Deg useggas n 2019 yessuffeɣ « Uccen d umeksa » n ucennay Zayen. Deg useggas-agi n 2020 yettunefk-as warraz n tsekla n yilemẓiyen i d-tessuddes tesveddit takanadit « Tiregwa ».
Ugar aya, mmi-s n Cṛfa n Behlul, yexdem aṭas n yisaragen d temliliyin, deg waṭas n temnaḍin di tmurt Taqvaylit, d tamiwin nniḍen. Yettwanced ɣer xilla n tedwilin ama deg yimaṭṭafen neɣ deg tiliẓriwin. Akka tura yettheggi tasfift-nniḍen.
Ayen i d-yessaẓreg :
– Amicalement votre, ammud n yifɣal, 2013
– Ɛeẓẓi akked Ɛezzul, tasfift n wunuɣen, 2016
– Aqejmammar, tasfift n wunuɣen, 2017
– Tafɣult, ammud n yifɣal, 2018
– Uccen d umeksa, tasfift n wunuɣen, 2019
– Tamacahut n tsekkurt, tasfift n wunuɣen, 2020
