Akken ad d-beggnen ibeddi-nsen ɣer yidis n yimeɣnasen imunaẓriyen{indépendantistes} n teqbaylit, yessawel-d Uzedduy{Coordination} n MAK Paris IDF i yakk Iqbayliyen n yinig, d wid akk yekkaten ɣef yizerfan n umdan, akken ad gen amsegraw ass n acer 31 di yennayer-a n 2021 ɣef 13:00, mettwal amiṭru Invalides.
Iswi n unejmuε-a mačči kan d afud n tegmat i yimeɣnasen i iḥeqqer udabu azzayri, maca daɣen d asendeh n nnaqus n umihi akken ad yeḥsu umaḍal meṛṛa d acu i sεeddayen yimeɣnasen imelwiyen{pacifiques} n Tmurt Taqbaylit gar waccaren n temsulta d teɣdemt n Lezzayer.
Ad d-nesmekti dakken teffeɣ-d tiɣri-a tuzribt seld takriḍt{violence} akk i d-yellan ussan-a ɣef yimeɣnasen n MAK. Ama d wid i ssekcamen di leḥbus, wid i sεeddayen di teɣdemt neɣ d wid umi sserwan adebbuz d tekriḍt. Am wayen i d-yeḍṛan ass n 28 yennayer deg Ugezdu n Bgayet, mi ttewten kra n yimeɣnasen, amedya n Sifaks At Mḥend i sexnunnsen tama n yemma-s d uletma-s. Ula d igerdan ur sliken seg yiɣil amesbaṭli n udabu azzayri.
Dɣa, ɣef wakken i d-tuwi tnegga taqbaylit n yisallen Siwel, iεewwel udabu azzayri ad issusem s yal abrid taɣect n yal ilemẓi Aqbayli i yettnaɣen s talwit ɣef tlelli-s, akal-is, tutlayt-is d yidles-is, di lawan ideg ttheggin Yiqbayliyen i usmekti n tedyanin n Tefsut Taberkant.
Yelha ad d-nerr awellih dakken ar tura ala Aseqqamu n uḥuddu ɣef tlelliyin (CDL) i d-yewwten di lbaṭṭel i iḍerrun ɣef yimeɣnasen n tmunent n Tmurt Taqbaylit. Ikabaren isertanen, baḥ ulac!
